Ushtruesja e detyrës së Presidentes së Republikës së Kosovës, Albulena Haxhiu, së bashku me kryeministrin në detyrë, Albin Kurti, morën pjesë në ceremoninë zyrtare të pranimit të komandës së U.S. Army Area Support Group Balkans, e cila u zhvillua në kampin Bondsteel.
Në këtë ceremoni, koloneli Kurt A. Rorvik mori zyrtarisht detyrën e komandantit të ri të këtij grupi mbështetës. Përmes një postimi në rrjetet sociale, Haxhiu vlerësoi shërbimin dhe përkushtimin e komandantit në largim, si dhe theksoi rëndësinë e bashkëpunimit të deritanishëm midis kampit Bondsteel, institucioneve të sigurisë, autoriteteve civile dhe qytetarëve të Kosovës.
Duke i uruar suksese kolonelit Rorvik në përgjegjësitë e tij të reja, Haxhiu shprehu bindjen se bashkëpunimi do të vijojë të forcohet në funksion të sigurisë së vendit dhe stabilitetit rajonal. Ajo shprehu mirënjohjen e institucioneve të Kosovës ndaj Shteteve të Bashkuara të Amerikës dhe Forcave të Armatosura Amerikane, duke vlerësuar kontributin e tyre në proceset e lirisë, pavarësisë dhe shtetndërtimit të vendit.