Aleanca diskuton vendimin e Speciales dhe zgjedhjen e presidentit

Kryesia e Aleancës mbajti mbledhjen e saj të radhës, të parën pas vendimit të fundit të Gjykatës Speciale në Hagë, në një moment kur vendi po i afrohet afatit përfundimtar për zgjedhjen e presidentit. Kryetari i partisë, Ardian Gjini, theksoi se qëndrimi i Aleancës ndaj Gjykatës Speciale mbetet i prerë dhe konsistent. Sipas Gjinit, është e domosdoshme që çështja e ndihmës ligjore për krerët e UÇK-së në Hagë dhe mbrojtja e të drejtës shtetërore të mos ngatërrohen me politika ditore partiake. Në lidhje me procesin për zgjedhjen e presidentit, ai shprehu shqetësimin mbi zvarritjet e vazhdueshme dhe tendencat për manovra me afate e lëndë të reja në Gjykatën Kushtetuese, duke paralajmëruar se këto veprime rrezikojnë të shtojnë paqartësinë për qytetarët e Kosovës. Aleanca rikonfirmoi angazhimin e saj politik për mbrojtjen e rendit kushtetues dhe rikthimin e normalitetit institucional në vend. Kryetari Gjini deklaroi se partia do të vijojë të ndjekë të gjitha rrugët politike për të siguruar funksionalitetin e institucioneve dhe për të kontribuar në zhvillimin ekonomiko-social, duke e konsideruar këtë qasje si konstruktive ndaj historisë, të tashmes dhe të ardhmes së vendit.