Kryesia e Aleancës mbajti mbledhjen e radhës më 13 tetor, ku diskutoi zhvillimet e fundit politike në vend, me fokus te proceset pas zgjedhjes së Presidentes dhe votimi i ligjit lidhur me Dhomat e Specializuara në Hagë. Partia rikonfirmoi pozicionin e saj opozitar dhe tha se do të vazhdojë të ofrojë alternativa konkrete e të matshme, duke mbrojtur interesin shtetëror.
Në njoftimin e saj, Aleanca tha se nuk do të mjaftohet vetëm me kritikë ndaj qeverisjes, të cilën e cilësoi si të keqe. Ajo theksoi se synon të paraqesë zgjidhje që i shërbejnë vendit dhe qytetarëve.
Sa u përket proceseve në Hagë, partia rikonfirmoi mbështetjen për luftën çlirimtare dhe kërkoi që ndihma ligjore për krerët e Ushtrisë Çlirimtare të Kosovës (UÇK) të trajtohet me seriozitetin më të lartë shtetëror. Sipas Aleancës, procesi duhet të jetë i ndarë nga interesat dhe ndërhyrjet e politikës ditore.
Një pjesë e diskutimeve iu kushtua fuqizimit të strukturave të partisë në të gjitha nivelet organizative. Ky proces mobilizimi do të konkretizohet të shtunën në Prishtinë, në takimin e parë të gjerë me strukturat e Aleancës. Sipas njoftimit, aty do të paraqiten platforma politike dhe hapat e ardhshëm të angazhimit politik.
Kryesia miratoi gjithashtu raportin financiar tremujor. Ajo vendosi që nënkryetari i parë, Besnik Tahiri, deri në mbledhjen e ardhshme t’i paraqesë Kryesisë propozim-statutin dhe propozim-programin për themelimin e Akademisë Politike të së Djathtës të Aleancës.