Kryesia e re e Aleancës ka zhvilluar mbledhjen e saj konstituive, pas përfundimit të procesit të zgjedhjeve të brendshme. Kryetari i Aleancës, Ardian Gjini, ka njoftuar se gjatë këtij takimi janë miratuar agjenda vjetore e punës dhe plani i aktiviteteve, të cilat do të shtrihen në të gjitha degët e partisë në Kosovë.
Krahas çështjeve organizative, Kryesia ka diskutuar hollësisht rreth zhvillimeve politike në vend pas zgjedhjeve të përgjithshme dhe nevojës për krijimin e institucioneve të qëndrueshme. Gjini ka theksuar se Aleanca mbetet e përkushtuar për një proces politik që garanton stabilitet, përgjegjësi dhe një orientim të qartë për shtetin.
Duke iu referuar ofertës politike të partisë, Ardian Gjini ka nënvizuar se oferta gjashtëpikëshe mbetet baza për zhvillimin ekonomik dhe sigurinë kombëtare. Sipas tij, çdo palë që synon ndërtimin e institucioneve të qëndrueshme duhet të kuptojë se këto projekte strategjike janë të panegociueshme për të ardhmen e Kosovës.
Përditësime
Ardian Gjini akuzoi palën fituese të zgjedhjeve për shpërfillje të ofertës së Aleancës dhe shkelje të afateve kushtetuese, duke paralajmëruar rrezikun e një bllokade institucionale. Gjini deklaroi se moskrijimi i institucioneve do të sjellë pasoja direkte në ekonomi, shëndetësi dhe arsim.