Aleksander Ceferin rikandidon për një mandat të ri në krye të UEFA-s

Presidenti i UEFA-s, Aleksander Ceferin, ka pranuar zyrtarisht kërkesën për të kandiduar për një mandat të ri në krye të futbollit evropian. Në një deklaratë publike, ai bëri të ditur se vendimi për të vijuar detyrën ka ardhur pas mbështetjes së marrë nga familja e tij dhe federatat anëtare. Duke falënderuar mbështetësit, Ceferin theksoi se synimi i tij është të përgatisë institucionin për gjeneratën e ardhshme të futbollit. Njoftimi pason konsultimet e gjera gjatë programit "Top Executive Programme" (TEP) të zhvilluar në Berlin, ku morën pjesë përfaqësues të 55 federatave anëtare, përfshirë presidentin e FSHF-së, Armand Duka.

Vendimi vjen si përgjigje ndaj kërkesave unanime të federatave që Ceferin të rishikonte qëndrimin e tij të vitit 2024, kur kishte deklaruar se nuk do të kërkonte një mandat tjetër. Kandidatura për rizgjedhje do të formalizohet në Kongresin e 51-të të Zakonshëm të UEFA-s, që do të zhvillohet në Astana, Kazakistan, më 22 prill 2027.

Rregullorja për mandatet

Ceferin është në krye të UEFA-s që nga shtatori i vitit 2016, pas largimit të Michel Platini. Ai mund të rikandidojë për shkak të ndryshimit statutor të miratuar në vitin 2024, sipas të cilit mandatet e kryera ose të nisura përpara datës 1 korrik 2017 nuk llogariten në kufirin prej tre mandatesh të parashikuar nga reformat e qeverisjes.

Reforma e FIFA-s

Gjatë takimit në Berlin, federatat anëtare, me përjashtim të Federatës së Futbollit të Azerbajxhanit, shprehën humbjen e besimit ndaj lidershipit aktual të FIFA-s. Në një dokument aneks, përfaqësuesit kërkuan reforma të thella që përfshijnë:
• Ndarjen e qartë të pushteteve midis organeve vendimmarrëse.
• Fuqizimin e Byrosë dhe Këshillit të FIFA-s.
• Kufizimin e rolit të Presidentit në përfaqësim global pa funksione menaxheriale.
• Nevojën për një lidership të ri që gëzon besimin e të gjitha rajoneve.

Një takim tjetër i 55 federatave anëtare është parashikuar të zhvillohet përpara datës 17 nëntor 2026 për të vijuar diskutimet mbi qeverisjen e futbollit.