Kryetari i Bashkimit Demokratik për Integrim, Ali Ahmeti, ka përkujtuar përmes një shkrimi në rrjetet sociale veprimtarinë dhe sakrificën e Fehmi dhe Xhevë Lladrovcit. Në këtë përvjetor të 28-të të rënies së tyre, Ahmeti i përshkroi ata si figura që i përkushtuan jetën lirisë së Kosovës, duke theksuar se kishin qenë pjesë e një brezi veprimtarësh që nuk u pajtuan asnjëherë me robërinë.
Në mesazhin e tij, Ahmeti e cilësoi Fehmi Lladrovcin si shok të ngushtë, bashkëmendimtar, bashkëveprimtar dhe bashkëluftëtar, me të cilin kishte ndarë angazhimet për çështjen kombëtare shumë kohë përpara themelimit të Ushtrisë Çlirimtare të Kosovës. Ai theksoi se çifti kishte jetuar dhe kishte vepruar gjithmonë bashkë, qëllim që u dëshmua edhe në momentin e rënies së tyre.
Fehmi dhe Xhevë Lladrovci ranë krah për krah më 22 shtator 1998, në betejën e Drenicës. Duke e mbyllur mesazhin e tij, Ahmeti shprehu mirënjohje për idealin e tyre, duke theksuar se flamuri për të cilin ata dhanë jetën sot valon i lirë, ndërsa kujtimi për ta mbetet i përjetshëm.