Në natën e 11-të të protestës në sheshin e Prishtinës kundër vendimeve të Gjykatës Speciale në Hagë për ish-udhëheqësit e Ushtrisë Çlirimtare të Kosovës, ka mbajtur një fjalim Fahri Fazliu, nipi i heronjve të kombit Fahri dhe Bahri Fazliu. Ai theksoi se liria e vendit nuk ishte një dhuratë, por një proces i paguar me gjakun dhe sakrificën e shumë familjeve shqiptare ndër vite.
Fahri Fazliu, djali i veprimtarit Fadil Fazliu, shprehu qëndrimin se familjet e dëshmorëve kërkojnë drejtësi dhe dinjitet për çlirimtarët, duke kërkuar konkretisht drejtësi për Hashim Thaçin, Kadri Veselin, Jakup Krasniqin, Rexhep Selimin, Sali Mustafën dhe Pjetër Shalën. Gjatë fjalimit, nga turma u përsërit parulla "Jo në emrin tim!".
Fazliu vlerësoi se ata që po gjykohen në Hagë janë pjesë e një periudhe historike që nuk mund të shkëputet nga lufta për liri. Ai theksoi se brezi i ri ka detyrë ruajtjen e kujtesës dhe mbrojtjen e vlerave të luftës, duke shtuar se zëri i tyre do të mbetet gjithmonë në mbështetje të drejtësisë dhe të vërtetës.