Protesta me thirrjen “Jo në emrin tim” ka vazhduar për të shtatën natë radhazi në Sheshin “Skënderbeu” në Prishtinë. Tubimi është organizuar si shenjë kundërshtimi ndaj vendimeve të Dhomave të Specializuara në Hagë ndaj ish-krerëve të Ushtrisë Çlirimtare të Kosovës.
Në mesin e folësve të mbrëmjes ishte Gentian Selimi, nxënës i gjimnazit “Ahmet Gashi” dhe nipi i ish-drejtuesit të UÇK-së, Rexhep Selimi. Në fjalën e tij, ai deklaroi se, ndonëse nuk e ka përjetuar luftën, brezi i ri mban përgjegjësinë për të ruajtur kujtesën mbi sakrificat që çuan në lirinë e vendit. Sipas tij, mundësia për t'u arsimuar dhe për të planifikuar të ardhmen është rezultat i drejtpërdrejtë i flijimit të një brezi paraardhës.
“Sot kemi ardhur për të kërkuar drejtësi për Hashim Thaçin, Kadri Veselin, Jakup Krasniqin dhe Rexhep Selimin. Jemi këtu sepse kemi zërin tonë dhe kemi të drejtë ta theksojmë atë që besojmë”, u shpreh Selimi. Ai theksoi se protesta nuk është e nxitur nga urrejtja, por nga kërkesa për drejtësi të barabartë dhe nga nevoja që të mos harrohet çmimi i lirisë, fati i të pagjeturve dhe dëshmia e familjeve që humbën të dashurit gjatë luftës.
Selimi renditi disa elemente që ndihmojnë në ndërtimin e kujtesës kolektive, si memorialet, këngët kushtuar dëshmorëve dhe rrëfimet e atyre që e përjetuan periudhën e konfliktit. Ai u bëri thirrje bashkëmoshatarëve të tij që ta shohin ndërtimin e shtetit si një amanet dhe një detyrim për të kontribuar me dije, punë dhe përgjegjësi. Fjalimin e tij, Selimi e mbylli duke ia kushtuar thirrjen e protestës të rënëve, të pagjeturve, familjeve të tyre, si dhe veteranëve e invalidëve të luftës.