Lideri i Bashkimit Demokratik për Integrim (BDI), Ali Ahmeti, ka zbuluar detaje mbi ekzistencën e një plani për ndarjen e Maqedonisë në baza etnike, i cili daton përpara Marrëveshjes së Ohrit. Sipas Ahmetit, ky propozim i ishte adresuar atij, si dhe ish-kryeministrave të Shqipërisë, Fatos Nanos dhe Sali Berishës. Ahmeti theksoi se të gjitha palët e përfshira, në koordinim me SHBA dhe vendet perëndimore, e refuzuan në mënyrë kategorike këtë plan.
Gjatë intervistës në emisionin Click në RTV21, Ahmeti trajtoi edhe situatën aktuale politike, duke kritikuar ashpër koalicionin VLEN për hyrjen në Qeveri. Sipas tij, kjo qasje mungon legjitimiteti dhe dëmton përfaqësimin e shqiptarëve. Ahmeti vlerësoi se VLEN e ka "shitur lëkurën shumë lirë" dhe ka degraduar të drejtat e fituara më parë, duke përmendur regresin në çështje si përfaqësimi i drejtë, ligji i gjuhës dhe çështja e Tribunalit të Hagës. Ai krahasoi këtë situatë me periudhën kur BDI qeveriste me VMRO-DPMNE ose LSDM, ku, sipas tij, çdo vendim shoqërohej me marrëveshje politike që çonte përpara të drejtat e shqiptarëve.
Kreu i BDI-së theksoi se përplasjen e tij kryesore e ka me VMRO-në, ndërsa ndaj koalicionit VLEN shprehu keqardhje, duke e cilësuar veprimin e tyre si një poshtërim të legjitimitetit të votës së shqiptarëve. Ai pohoi se situata aktuale, përfshirë ndryshimet në përqindjen e përfaqësimit në institucione, kërkon përpjekje të mëdha për t'u rikthyer në gjendjen e dëshirueshme.
Përditësime
Kryetari i BDI-së, Ali Ahmeti, kërkoi zyrtarisht zgjedhje të parakohshme, duke parashikuar mundësinë e tyre gjatë vitit të ardhshëm. Ahmeti deklaroi se partia e tij është e përgatitur të përballet me procesin zgjedhor në çdo moment. Sipas tij, edhe partia maqedonase në pushtet ka vlerësuar se situata aktuale politike në vend ka humbur funksionalitetin.