Bashkëkryetari i koalicionit VLEN, Izet Mexhiti, ka hedhur poshtë mundësinë e mbajtjes së zgjedhjeve të parakohshme parlamentare, duke vlerësuar se një proces i tillë do të sillte bllokim të punëve institucionale dhe shpenzime të panevojshme për qytetarët. Ai argumentoi se institucionet funksionojnë normalisht me një shumicë absolute në Kuvend.
Mexhiti akuzoi partinë opozitare BDI se e mban vazhdimisht temën e zgjedhjeve në vëmendje si një strategji për të mos humbur elektoratin, pas një periudhe të gjatë premtimesh të parealizuara. Sipas tij, përpjekjet për zgjedhje të parakohshme ndodhin edhe kur opozita nuk ka një alternativë konkrete për të ofruar.
Sipas Mexhitit, fokusi aktual i qeverisë është drejtuar te realizimi i programit qeverisës, konkretisht te vendimet për mjekët, investimet në spitale dhe në sistemin e arsimit. Ai theksoi se institucionet nuk duhet të eksperimentojnë me procese që do të bllokonin prokurimet, punësimet dhe vendimmarrjet e rëndësishme.
Ndonëse refuzoi kërkesën për zgjedhje, Mexhiti ritheksoi se koalicioni VLEN është forca politike më e mbështetur te votuesit shqiptarë, duke iu referuar anketave të fundit. Ai shtoi se kjo mbështetje nuk do të thotë se koalicioni u ikën zgjedhjeve, por se për momentin përparësi mbetet kërkimi i zgjidhjeve për qytetarët.
“Për momentin punojmë për zgjidhje, jo për zgjedhje”, deklaroi Mexhiti.