Ndërsa Irani përballet me pasojat e sulmeve të SHBA-së dhe Izraelit, të cilat kanë vrarë disa, ndoshta edhe dhjetëra udhëheqës të lartë, Ali Larijani shfaqet si figurë kryesore në pushtetin e mbetur të vendit.
Politikan veteran me një karrierë që përfshin pothuajse gjithë historinë e Republikës Islamike, Larijani u rikthye vitin e kaluar pas një pushimi relativ dhe që atëherë ka një rol gjithnjë e më të rëndësishëm.
Rikthimi politik
Një moment vendimtar për fatin e Larijanit ishte lufta 12-ditore e Iranit me Izraelin dhe Shtetet e Bashkuara në qershor të vitit të kaluar. Vitin paraprak, 67-vjeçarit i ishte ndaluar të kandidonte për president për herë të dytë në tre vjet. Por në gusht, pas konfliktit, ai u emërua sekretar i Këshillit Suprem të Sigurisë Kombëtare të Iranit, organit kryesor për hartimin e politikave në vend.
Analisti politik iranian në Londër, Babak Dorbeigi, deklaroi për Radion Farda të Radios Evropa e Lirë se gjatë luftës 12-ditore ndodhën zhvillime të rëndësishme. Ai theksoi llogaritjen e gabuar të aftësive mbrojtëse të Iranit dhe kuptimin se, në kohë lufte, nuk mund të mbështetesh te udhëheqësi suprem Ajatollah Ali Khamenei. Ky i fundit tani është i vdekur, ndërsa mbrojtja ajrore e Iranit është e mbingarkuar.
Larijani është bërë një nga zërat më të fuqishëm zyrtarë në Iran. Më 2 mars, ai tha se Irani nuk do të negociojë. Ai e pasoi këtë deklaratë me postime agresive në platformën X, duke përfshirë mesazhe që tallnin presidentin e SHBA-së, Donald Trump. “Trump e tradhtoi politikën ‘Amerika e para’ për të miratuar politikën ‘Izraeli i pari’”, shkroi ai në një postim në gjuhën angleze me shkronja të mëdha.
Më 1 mars, Larijani njoftoi se është ngritur një këshill i ri udhëheqës i përkohshëm për të qeverisur Iranin.