Massimiliano Allegri, trajneri i Milanit, në konferencën për shtyp para ndeshjes kundër Torinos, foli për të ardhmen e Luka Modriçit, i cili do të vendosë në fund të sezonit nëse do të qëndrojë me kuqezinjtë.
"Nuk kam folur me Lukën. Varet nga ai", tha shkurt Allegri.
Sa i përket garës për titullin në Serie A, ai u shpreh: "Është normale që humbja kundër Lacios, siç thashë pas ndeshjes, pati një ndikim të madh. Interi mendoi se kishte humbur dy pikë dhe në fund fitoi një. Gjithçka është ende e hapur, derisa matematika të thotë të kundërtën. Interi ka një epërsi të madhe dhe fati i tyre është në duart e tyre. Ne e kemi atë për Ligën e Kampioneve. Kur matematika të thotë se nuk mund t’i kapim më zikaltërit, kjo do të thotë se nuk mund ta fitojmë më titullin."