Autoriteti i Mediave Audiovizive (AMA) njoftoi mbylljen e aplikacionit pirat AlbKanale, i cili transmetonte në mënyrë të paligjshme paketa televizive të mbrojtura me të drejta autori, si ato të Digitalb, Tring, si dhe kanalet e TV Klan dhe RTSH. Institucioni sqaroi se shërbimi është bllokuar si rezultat i një pune teknike të detajuar, e cila përfshiu monitorimin e trafikut të rrjetit, identifikimin e serverëve burimorë dhe bashkëpunimin me operatorë ndërkombëtarë.
Pas ndërprerjes së shërbimit, operatorët e aplikacionit publikuan një njoftim ku pretendonin se shërbimi kishte rënë pre e një sulmi kibernetik, duke u kërkuar përdoruesve të dërgonin kontribute financiare në formën e kriptomonedhave për rikthimin e tij. AMA e ka cilësuar këtë pretendim si të pavërtetë, duke nënvizuar se ndërprerja e aplikacionit është pasojë direkte e veprimeve të grupeve të inspektimit kundër një veprimtarie të kundërligjshme.
Kryetarja e AMA, Armela Krasniqi, u bëri thirrje qytetarëve që të mos bien pre e këtij mashtrimi dhe të mos dërgojnë para, pasi transaksionet me kriptomonedha janë të pakthyeshme. Institucioni theksoi se anonimati në këto shërbime është i pamundur, pasi çdo veprimtari lë gjurmë të dokumentueshme. AMA u ka kërkuar publikut që të shfrytëzojë vetëm shërbime dhe operatorë të licencuar, duke rikonfirmuar angazhimin e saj për vijimin e luftës ndaj piraterisë audiovizive.