Autoriteti i Mediave Audiovizive (AMA) ka njoftuar mbylljen e platformës së paligjshme të transmetimit në internet, shqiperia.dev. Kjo faqe, e cila frekuentohej për të ndjekur ndeshje futbolli dhe përmbajtje të tjera, ritransmetonte pa autorizim programacionin e operatorëve të licencuar në Shqipëri.
Drejtoresha e AMA-s, Armela Krasniqi, bëri të ditur përmes një njoftimi zyrtar se institucioni që ajo drejton raportoi shkeljen e të drejtave të transmetimit te kompania ndërkombëtare Cloudflare. Ky veprim çoi në identifikimin e ofruesve të shërbimit të hostimit që mbështesnin infrastrukturën e kësaj platforme, duke bërë që faqja të bëhet e paarritshme për publikun.
Sipas AMA-s, ky aksion është pjesë e strategjisë për të mbrojtur operatorët e licencuar, si DigitAlb dhe Tring, të cilët dëmtoheshin nga pirateria online. Krasniqi theksoi se monitorimi i platformave të ngjashme do të vijojë, me qëllim zbatimin e ligjit mbi të drejtat e autorit dhe mbrojtjen e produktit audioviziv në tregun shqiptar.