Në Tiranë po zhvillon punimet konferenca e 63-të e Platformës Evropiane të Autoriteteve Rregullatore. Kjo është rrjeti më i vjetër dhe më i madh i rregullatorëve të medias në Evropë. Për herë të parë delegacione nga 42 vende europiane marrin pjesë në këtë aktivitet që organizohet nga Autoriteti i Mediave Audiovizive.
Punimet e mbledhjes u hapën nga kryetarja e bordit të EPRA-s Stephanie Comey. Ajo falënderoi Autoritetin e Mediave Audiovizive për mikpritjen dhe theksoi se EPRA funksionon si forum i hapur, jo politik dhe neutral. Anëtarët duhet të ruajnë të njëjtat vlera dhe neutralitetin institucional.
Kryetarja e AMA-s Armela Krasniqi paraqiti zhvillimet kryesore në peizazhin audioviziv shqiptar. Ajo u ndal te roli rregullator i AMA-s, kuadri ligjor dhe përafrimi me standardet europiane. U prezantua strategjia e AMA-s për periudhën 2024-2026 që synon rritjen e transparencës, forcimin e efikasitetit institucional dhe harmonizimin e legjislacionit me kuadrin europian përfshirë AVMSD, EMFA dhe DSA.
Krasniqi foli edhe për ndryshimet ligjore në proces që synojnë rritjen e përgjegjësisë së platformave digjitale, mbrojtjen e lirisë së medias dhe transparencën e pronësisë mediatike. Ajo paraqiti regjistrin e transparencës së pronësisë së medias audiovizive që është aksesueshëm për publikun.