Ambasada e Shteteve të Bashkuara në Tiranë ka lëshuar një paralajmërim për qytetarët e saj në lidhje me protestën e planifikuar nga Partia Demokratike dhe opozita më 10 shkurt 2026, në orën 17:00. Demonstruesit pritet të mblidhen para ndërtesës së Kryeministrisë, në Bulevardin Dëshmorët e Kombit, midis Sheshit Skënderbej dhe Sheshit Nënë Tereza.
Autoritetet shqiptare kanë njoftuar për prani të shtuar policie, bllokime rrugësh, ndërprerje trafiku dhe mundësi bllokimi të kryqëzimeve në qendër të qytetit. Ambasada thekson se tubimet shpesh fillojnë paqësisht, por situata mund të ndryshojë shpejt, duke u shtrirë në blloqe dhe ndërtesa qeveritare përreth.
Qytetarët amerikanë këshillohen të shmangin krejtësisht zonën e protestës, të qëndrojnë vigjilentë, të monitorojnë mediat lokale dhe të ndjekin udhëzimet e autoriteteve të zbatimit të ligjit. Personelit të Ambasadës i është dhënë i njëjti udhëzim.
Këshilla sigurie
Ambasada rekomandon praktikimin e zakoneve të sigurisë si:
• Shmangien e plotë të ngjarjes;
• Vetëdijësim të vazhdueshëm ndaj mjedisit;
• Kufizimin e shpërqendrimeve, si përdorimi i telefonave apo kufjeve;
• Mbajtjen e një profili të ulët dhe përgatitjen e një plani emergjence.