Ambasada e Mbretërisë së Bashkuar në Kosovë ka njoftuar se po i monitoron nga afër zhvillimet lidhur me shembjen e objekteve banesore pranë Liqenit të Ujmanit, të njohur edhe si Gazivoda. Përmes një deklarate zyrtare, institucioni ka nënvizuar se sundimi i ligjit kërkon procese të drejta dhe transparente, ku qytetarët e prekur duhet të kenë mundësinë e ushtrimit të të drejtave të tyre ligjore.
Shqetësimi kryesor i shprehur nga përfaqësia diplomatike lidhet me faktin se veprimet për zbatimin e vendimeve po ndërmerren ndërkohë që procedurat gjyqësore përkatëse nuk kanë përfunduar ende. Sipas ambasadës, respektimi i ligjit duhet të zbatohet në mënyrë të njëtrajtshme dhe të paanshme në të gjithë territorin e Kosovës.
Në fund të reagimit, autoritetet e Kosovës janë ftuar që të angazhohen në dialog me komunitetet e prekura për t'i trajtuar shqetësimet e tyre në mënyrë transparente. Gjithashtu, është bërë apel për shmangien e çdo veprimi të mëtejshëm që mund të minojë besimin e publikut ose të cënojë marrëdhëniet ndërmjet komuniteteve.
Përditësime
Përfaqësuesit e Bashkimit Evropian dhe Ambasadës Gjermane janë bashkuar qëndrimit të Ambasadës Britanike, duke shprehur shqetësim për rrënimin e vilave te Liqeni i Ujmanit, proces i konfirmuar nga autoritetet përkatëse.