Për shkak të fluksit të shtuar të udhëtarëve gjatë sezonit veror, Ambasada e Republikës së Kosovës në Kroaci ka ndërmarrë masa mbështetëse për qytetarët në pikën kufitare Bajakovo. Stafi i ambasadës, i shoqëruar nga ambasadori Martin Berishaj, ka shpërndarë ujë dhe pako ushqimore për udhëtarët. Ndihmat janë mundësuar falë kontributit të qytetarit Hakif Qenaj.
Sipas Ministrisë së Punëve të Jashtme dhe Diasporës, pas vonesave që shkuan deri në 12 orë gjatë ditës, situata është stabilizuar. Aktualisht, qarkullimi në Bajakovo po zhvillohet me efikasitet, ndërsa koha e pritjes është shkurtuar në 10–15 minuta. Në funksion janë vënë tetë korsi hyrëse për të përshpejtuar procesin.
Autoritetet theksojnë se shkaku kryesor i bllokimit të përkohshëm ka qenë zbatimi i sistemit të ri të hyrje-daljeve, EES (Entry/Exit System), i cili ka sjellë procedura të reja të kontrollit kufitar. Ambasada e Kosovës njoftoi se do të vazhdojë monitorimin e situatës për të ofruar mbështetjen e nevojshme për bashkatdhetarët përgjatë sezonit të verës.