Pas raportimeve për kolona dhe vonesa të zgjatura gjatë ditës, situata në pikën kufitare Bajakovo, që lidh Kroacinë me Serbinë, është normalizuar. Ministria e Punëve të Jashtme dhe Diasporës (MPJD) njoftoi se qarkullimi tani po zhvillohet pa pengesa.
Sipas autoriteteve, ngadalësimet e përkohshme kanë qenë pasojë e fillimit të zbatimit të sistemit EES (Entry/Exit System), i cili përfshin procedura shtesë të kontrollit në kufi. MPJD, përmes Ambasadës së Republikës së Kosovës në Kroaci, ka mbajtur komunikim të vazhdueshëm me autoritetet kufitare për të ndjekur situatën.
Ambasadori Martin Berishaj, së bashku me stafin e ambasadës, ka vizituar pikën kufitare në Bajakovo për të ofruar mbështetje për qytetarët që ndodheshin në pritje. Institucionet kanë theksuar se do të mbeten të angazhuara për asistencë ndaj bashkatdhetarëve, veçanërisht gjatë periudhës së verës, kur fluksi i lëvizjeve në pikat kufitare rritet në mënyrë të ndjeshme.
Përditësime
Qarkullimi kufitar ndërmjet Kroacisë dhe Serbisë është normalizuar, ku pritjet në pikën kufitare Bajakovo kanë rënë në 10-15 minuta. Në shenjë mbështetjeje, Ambasada e Kosovës u ofroi ndihmë me ujë dhe ushqim udhëtarëve gjatë kohës së pritjes. Ndërkohë, ekspertët vlerësojnë se sistemit të ri të hyrje-daljeve (EES) do t'i duhen deri në dy vjet për të arritur stabilitet të plotë operacional.