Ambasada e Shteteve të Bashkuara në Tiranë ka shpërndarë mesazhin prezidental të Donald Trump-it me rastin e nisjes së muajit të shenjtë të Ramazanit më 19 shkurt 2026.
Në mesazh, presidenti amerikan u dërgon përshëndetjet dhe urimet më të mira besimtarëve myslimanë në mbarë botën. “Sot, u dërgoj përshëndetjet dhe urimet e mia më të mira të gjithë atyre që festojnë Ramazanin. Çdo Ramazan përfaqëson një periudhë përkushtimi ndaj ripërtëritjes shpirtërore, meditimit reflektues dhe vlerësimit për bekimet e panumërta të Zotit”, thuhet në mesazhin prezidental.
Trump-i thekson se kjo periudhë forcon lidhjet familjare dhe komunitare, si dhe vlerat e përbashkëta si dhembshuria, bamirësia, mëshira dhe përulësia. Ai vlerëson rëndësinë e lutjes dhe agjërimit për shumë amerikanë, duke nënvizuar lirinë fetare si shtyllë të prosperitetit të SHBA-së. “E drejta e dhënë nga Zoti për të adhuruar lirisht është një tipar dallues i kombit tonë”, shkruan ai.
Në fund, Trump-i ofron lutjet për lumturi dhe suksese në familje, unitet dhe paqe në botë, si dhe begati për vitin e ardhshëm. Besimtarët myslimanë kanë nisur agjërimin 30-ditor, muaj që lidhet me agjërimin, Kur'anin, mëshirën dhe faljen.