Përfaqësues të ambasadës së Shteteve të Bashkuara të Amerikës do të zhvillojnë takime me kryetarin e Kuvendit para nisjes së sesionit të ri parlamentar. Këto takime pritet të zhvillohen në prag të sesionit, i cili do të nisë më 19 janar 2026.
Sipas burimeve, përfaqësuesit e ambasadës do të takojnë gjithashtu kryetarët e grupeve parlamentare. Në orën 12:00, do të zhvillohet takimi me kreun e grupit socialist Taulant Balla, ndërsa në orën 14:00 me kreun e grupit demokrat Gazment Bardhi.
Opozita ka vendosur të vazhdojë protestat në rrugë deri sa kryeministri Edi Rama të dorëzohet dhe të formohet një qeveri teknike. Demokratët kanë paralajmëruar se do të ridimensionojnë qëndrimin e tyre në Parlament, duke mos u ulur me socialistët për të negociuar reformën zgjedhore dhe atë territoriale.
Ndërkohë, mazhoranca socialiste është e vendosur të vazhdojë punën në dy komisionet kryesore edhe pa pjesëmarrjen e opozitës, nëse kjo e fundit braktis karriget. Kjo vendosmëri shkon deri në zëvendësimin e anëtarëve të opozitës në këto komisione.
Përditësime
Zëvendës Shefja e Misionit e Ambasadës së SHBA-së, Kathryn Hammond, zhvillon takime me zyrtarë të Kuvendit para sesionit të ri parlamentar. Takimi me deputetin Taulant Balla nisi në orën 12:00 dhe fokusohet në bashkëpunim, dialog si dhe avancimin e reformave territoriale dhe zgjedhore. Sesioni i kaluar parlamentar u mbyll me tensione, ndërsa Avokati i Popullit, Endri Shabani, u betua në detyrë.