Kuvendi i Shqipërisë do të rinisë punën të hënën me mbledhjen e Konferencës së Kryetarëve, e cila do të shqyrtojë kalendarin dhe programin e punës për pesë javët në vijim. Sesioni i dytë i legjislaturës së XI do të çelë zyrtarisht me seancën plenare pasdite në orën 17:00, ndërsa pak pas mesditës do të mblidhet komisioni parlamentar i reformave, i drejtuar nga deputeti Fatmir Xhafa.
Reformat pritet të jenë fokusi kryesor i këtij sesioni, por njëkohësisht edhe shkak përplasjesh mes mazhorancës dhe opozitës. Kryeministri Edi Rama ka deklaruar se Partia Socialiste nuk do ta tolerojë më atë që e cilëson si "pengmarrje" të Kuvendit nga opozita përmes procedurave. Ai ka paralajmëruar ndryshim të rregullores së Kuvendit, duke theksuar gatishmërinë për dialog, por ka shtuar se reformat do të avancohen edhe të vetëm në mungesë të tij. Rama ka kërkuar gjithashtu orë të gjata pune dhe shtim të numrit të seancave plenare.
Opozita, kryesisht Partia Demokratike, nuk ka treguar gatishmëri për të ulur tonet pa një zgjidhje politike për rastin e deputetes Belinda Balluku. Këshilli i Imunitetit do të mblidhet më 28 janar për të vendosur lidhur me arrestimin ose jo të saj, çka pritet të ndikojë në klimën politike.
Reformat kryesore
Sipas mazhorancës, dy reforma urgjente janë ajo zgjedhore dhe territoriale, të cilat duhet të përmbyllen brenda korrikut për zgjedhjet vendore të vitit 2027, që do të zhvillohen me një Kod Zgjedhor dhe hartë territoriale të re. Opozita i ka bojkotuar këto procese që nga dhjetori dhe nuk ka sinjalizuar rikthim në tryezë.
Partia Socialiste ka paralajmëruar se do të presë reflektim nga opozita vetëm deri në nisjen e këtij sesioni, përndryshe do të heqë dorë nga formula e konsensusit dhe do të marrë shumicën e vendeve në komisione. Bashkimi Evropian ka kërkuar gjithëpërfshirje në këto procese dhe jo reforma të njëanshme.