Kuvendi i Shqipërisë nis këtë të hëna sesionin e ri parlamentar, me rikthimin e deputetëve pas pushimeve të dimrit, në një klimë të tensionuar politike.
Punimet fillojnë me mbledhjen e Konferencës së Kryetarëve, e cila do të përcaktojë kalendarin dhe axhendën e punës për pesë javët e ardhshme. Në orën 17:00 parashikohet seanca plenare e parë.
Reforma në axhendë
Mazhoranca socialiste e konsideron urgjente reformën zgjedhore dhe reformën territoriale, të cilat synon t'i përmbyllë brenda muajit korrik, për zgjedhjet vendore të vitit 2027 me një Kod Zgjedhor dhe hartë territoriale të re.
Paralelisht, në axhendë mbetet synimi për një reformë të thellë kushtetuese brenda këtij mandati parlamentar.
Pozicionet politike
Opozita ka bojkotuar proceset që nga muaji dhjetor dhe nuk ka dhënë sinjale për rikthim në tryezë.
Socialistët presin reflektimin e opozitës në fillim të sesionit, por kanë paralajmëruar se, në mungesë të tij, do të heqin dorë nga formula e konsensusit dhe do të marrin shumicën e vendeve në tryezat e reformave.
Kjo qasje bie ndesh me kërkesat e Bashkimit Evropian për procese gjithëpërfshirëse dhe jo njëanshme.