Ambasada e Shteteve të Bashkuara në Tiranë i është përgjigjur interesimit të News24 lidhur me deklaratat e kryeministrit Edi Rama. Ai u shpreh se Parlamenti nuk ka asnjë ngut për të shqyrtuar kërkesën e Prokurorisë së Posaçme kundër Korrupsionit dhe Krimit të Rëndë (SPAK) për heqjen e imunitetit dhe arrestimin e zëvendëskryeministres Belinda Balluku.
Kërkesa e SPAK është depozituar në Kuvend më 16 dhjetor 2025. Balluku është marrë e pandehur për akuza që lidhen me tendera me vlerë miliona euro.
Në deklaratën për News24, Ambasada e SHBA thekson: "Pavarësia e institucioneve të drejtësisë në Shqipëri mbetet thelbësore për bashkëpunimin e vazhdueshëm mes Shteteve të Bashkuara dhe Shqipërisë në luftën kundër krimit ndërkombëtar". Përfaqësia diplomatike shmang komentet direkte për çështjen Balluku: "Nuk kemi koment për çështjet ligjore që janë në proces".
Një ditë më parë, Komisioni Europian reagoi ndaj deklaratave të Ramës: "Është përgjegjësi e Parlamentit të Shqipërisë që të trajtojë pa vonesë kërkesat për heqjen e imunitetit të anëtarëve të tij. Lufta efektive kundër korrupsionit është thelbësore për përparimin e Shqipërisë drejt anëtarësimit në BE dhe përmbushjen e pritshmërive të qytetarëve".
Shtetet e Bashkuara dhe Bashkimi Europian kanë mbështetur Reformën në Drejtësi që në nisje, si dhe punën e SPAK, Gjykatës së Posaçme Kundër Korrupsionit dhe Krimit të Rëndë (GJKKO) dhe Byrosë Kombëtare të Hetimit, me fokus luftën kundër korrupsionit dhe krimit.
Përditësime
Belinda Balluku pezullohet nga detyra e ministres.
- Partia Socialiste refuzoi kërkesën e SPAK-ut për heqjen e imunitetit parlamentar të saj.