Ambasadorët e vendeve anëtare të Bashkimit Europian të akredituar në Shqipëri kanë reaguar me një deklaratë të përbashkët ndaj kritikave të kreut të Partisë Demokratike, Sali Berishës, ndaj ambasadorit të BE-së, Silvio Gonzato.
Deklarata u publikua në Ditën e Europës, më 9 maj 2026, dhe thekson mbështetjen për Gonzaton dhe ekipin e tij. Në të thuhet: "Në dritën e kritikave të pajustifikuara dhe të papranueshme ndaj Bashkimit Europian dhe përfaqësuesve të tij, ne qëndrojmë të bashkuar në mbështetje të Ambasadorit të BE-së dhe ekipit të tij, dhe rikonfirmojmë besimin tonë të plotë në profesionalizmin, integritetin dhe shërbimin e tyre të përkushtuar."
Deklarata u shpërndar fillimisht nga dekani i trupit diplomatik të vendeve anëtare, ambasadori i Qipros në Athinë, Stavros Avgoustides, i cili mbulon edhe Shqipërinë, në platformën X. Më pas, ajo u shpërndar nga ambasada gjermane në Tiranë në faqen e saj zyrtare në Facebook.
Një ditë më parë, më 8 maj 2026, Sali Berisha kishte kritikuar Gonzaton, duke thënë se ai sillet si ambasador i kryeministrit Edi Rama dhe ka transmetuar në Bruksel informacione të pavërteta ndaj opozitës, sikur kjo e fundit të mos ishte për integrimin europian. Kjo ndodhi pas lajmit të dhënë nga Gonzato për raportin e ndërmjetëm pozitiv të IBAR-it për Shqipërinë.