Ambasadori i Bashkimit Evropian në Shqipëri, Silvio Gonzato, ka përmbyllur misionin e tij diplomatik 3-vjeçar në vend. Me anë të një mesazhi të publikuar në rrjetet sociale, ai ndau vlerësimet për eksperiencën e tij, duke kujtuar fillimin e detyrës në pikën kufitare të Hanit të Hotit dhe udhëtimet e shumta në të gjithë territorin shqiptar.
Gonzato vlerësoi shqiptarët si njerëz të zgjuar, ambiciozë dhe punëtorë, ndërsa vuri theksin te sfidat që ka parë nga afër gjatë mandatit të tij. Ai shprehu besimin se energjia dhe vendosmëria e qytetarëve do ta çojnë vendin drejt integrimit të plotë në Bashkimin Evropian. Puna e tij me kolegët është përqendruar në ndërtimin e institucioneve të forta dhe të pavarura, ku mbrohen të drejtat e shtresave më të cenueshme të shoqërisë.
Largimi i ambasadorit nga Shqipëria u krye përmes Portit të Durrësit të shtunën. Në fjalët e tij të lamtumirës, ai shprehu dëshirën për t'u rikthyer, duke shpresuar se në një të ardhme, qarkullimi mes Shqipërisë dhe vendeve të tjera evropiane nuk do të kërkojë më paraqitjen e dokumenteve të udhëtimit si pasaporta.
“Duket sikur ishte dje kur mbërrita në pikën kufitare të Hanit të Hotit dhe nisa aventurën time në Shqipëri. Tre vite më pas, zemra dhe shpirti im janë mbushur me kujtimet e takimeve me njerëz të jashtëzakonshëm”, shkroi Gonzato në mesazhin e tij drejtuar qytetarëve shqiptarë.