Ambasadori i Gjermanisë në Shqipëri, Karl Bergner, mori pjesë sot në ceremoninë përkujtimore të 83-vjetorit të masakrës së Borovës. Ngjarja e 6 korrikut 1943 shkaktoi 107 viktima, ndërsa diplomati gjerman e cilësoi këtë si një moment shumë të dhimbshëm për përfaqësimin gjerman.
Duke nderuar viktimat, ambasadori theksoi nevojën për të nxjerrë mësime nga historia. "Kjo ndodhi në emër të popullit gjerman, por këtu duam të shohim përpara. Duhet të ndërtojmë një shoqëri të bazuar te toleranca, të drejtat e njeriut dhe sundimi i ligjit, të cilat janë vlerat mbi të cilat është ndërtuar Bashkimi Evropian", u shpreh ai.
Në një prononcim për mediat, Karl Bergner iu përgjigj edhe pyetjeve lidhur me protestat në Tiranë. Sipas ambasadorit, çdo aktivitet i shoqërisë civile që zhvillohet në përputhje me vlerat evropiane është i mirëpritur, por protestat e dhunshme nuk përputhen me këto parime. Ai theksoi se përgjegjësia për aktet e dhunës mbetet ende një çështje për t'u sqaruar.
Gjatë fjalës së tij, diplomati rikonfirmoi mbështetjen e Gjermanisë për rrugën e integrimit të Shqipërisë. Ai vlerësoi përkushtimin e popullit shqiptar ndaj parimeve demokratike dhe siguroi mbështetjen e shtetit gjerman, veçanërisht në aspektin teknik të procesit, si dhe për të gjithë ata që mbrojnë sundimin e ligjit dhe vlerat evropiane në jetën e përditshme.