Kryetari i Organizatës së Veteranëve të Luftës së UÇK-së, Hysni Gucati, i shoqëruar nga bashkëpunëtorët e tij, priti sot në një takim ambasadorin e Mbretërisë së Bashkuar në Republikën e Kosovës, Jonathan Hargreaves. Gjatë këtij takimi, palët diskutuan për çështjet dhe preokupimet kryesore të veteranëve, si dhe për zhvillimet aktuale që lidhen me këtë kategori.
Nëpërmjet një njoftimi për media, OVL-UÇK theksoi rëndësinë e miqësisë së qëndrueshme dhe partneritetit midis Kosovës dhe Mbretërisë së Bashkuar. Përfaqësuesit e organizatës shprehën vlerësim të lartë për mbështetjen dhe kontributin e vazhdueshëm britanik për vendin.
Sipas veteranëve, takime të tilla janë thelbësore për të përcjellë në mënyrë të drejtpërdrejtë zërin, qëndrimet dhe kërkesat e tyre te miqtë dhe partnerët ndërkombëtarë të Kosovës.