Naim Tërnava, kryetar i Bashkësisë Islame të Kosovës (BIK), priti në takim ambasadorin e Mbretërisë së Bashkuar në Kosovë, Jonathan Hargreaves. Palët diskutuan për zhvillimet aktuale, mundësitë e bashkëpunimit dhe çështje të tjera me interes të përbashkët. Në takim u trajtuan edhe rastet e fundit të vrasjeve të grave në Kosovë dhe nevoja për angazhim të përbashkët institucional e shoqëror për parandalimin e dhunës ndaj grave.
Sipas njoftimit të BIK-ut, Tërnava e njohu ambasadorin me angazhimin e tij dhe të Bashkësisë Islame në këtë drejtim. Ai theksoi se institucionet fetare mund të kontribuojnë përmes edukimit, vetëdijesimit dhe promovimit të respektit për jetën dhe dinjitetin njerëzor.
Tërnava nënvizoi rëndësinë e bashkëpunimit ndërmjet institucioneve dhe faktorëve shoqërorë për të luftuar dhunën ndaj grave dhe për të ndërtuar një shoqëri ku mbizotërojnë respekti, siguria dhe përgjegjësia.
Nga ana e tij, Hargreaves vlerësoi mundësinë e takimit dhe shprehu gatishmërinë për të shqyrtuar mundësi bashkëpunimi në fusha me interes të përbashkët.