Ambasadori i Bashkimit Evropian në Shqipëri, Silvio Gonzato, zhvilloi më 23 shkurt një takim në Kuvendin e Shqipërisë me bashkëkryetarët e Komisionit të Posaçëm për Reformën Territoriale dhe Administrative, Arbjan Maznikun dhe Luçiano Boçin.
Takimi u cilësua si konstruktiv nga ambasadori, i cili në një reagim në rrjetet sociale theksoi rëndësinë e një reforme gjithëpërfshirëse dhe plotësisht transparente, të ndërtuar mbi të dhëna të sakta dhe konsensus të gjerë.
Gonzato nënvizoi se shpejtësia e reformave nuk mund të vijë në kurriz të cilësisë dhe rritja e efikasitetit nuk mund të vijë në kurriz të demokracisë vendore. Është e rëndësishme që funksionet të shoqërohen me financim të mjaftueshëm, në mënyrë që autoritetet vendore të kenë autonomi reale në vendimmarrje, të mbështetura nga kapacitetet e nevojshme.
Reforma mbetet thelbësore për të sjellë shërbime më të mira për qytetarët dhe për të qenë në përputhje me standardet evropiane, sipas reagimit të publikuar nga Delegacioni i BE-së në Shqipëri.
Sipas planeve të Komisionit, palët do të zhvillojnë dëgjesa në 12 qarqet e vendit me grupet e interesit dhe krerët e bashkive, si dhe takime me ekspertë ndërkombëtarë. Është parashikuar gjithashtu një sondazh publik para prezantimit të varianteve të reja të ndarjes territoriale.
Partia Demokratike shprehin skepticizëm ndaj produktit final, veçanërisht sa i përket numrit të bashkive në hartën e re territoriale.