Ambasadori i Shteteve të Bashkuara në Bashkimin Evropian, Andrew Puzder, foli në emisionin Europe Today të Euronews-it të mërkurën, duke thënë se administrata Donald Trump ka ndihmuar evropianët të ndalojnë së shtypuri butonin e shtyrjes dhe të "zgjohen".
Ai përshëndeti fjalimin e Sekretarit të Shtetit Marco Rubio në Konferencën e Sigurisë në Mynih si thirrje për harmoni më të madhe mes SHBA-së dhe Evropës, duke e cilësuar atë si "pozitive" për aleancën transatlantike. Puzder e quajti aftësinë e Rubio-s për të thënë gjëra që njerëzit duhet t'i dëgjojnë, edhe pse mund të mos duan, si "shenjë dalluese të një diplomati të madh".
Fjalimi i Rubio-s vjen një vit pasi zëvendëspresidenti JD Vance foli në të njëjtën konferencë, ku mesazhi i tij u perceptua si armiqësor ndaj aleatëve evropianë. Këtë radhë, sipas Puzder-it, publiku evropian "ishte shumë i hapur" dhe Rubio "mori duartrokitje në këmbë".
Ambasadori vuri në dukje progresin evropian në përafrimin e politikës së migracionit me atë amerikane. "Në fakt, mendoj se qëndrimi i BE-së mbi migracionin është afruar shumë me qëndrimin amerikan", tha ai. Puzder theksoi ndikimin e emigracionit masiv si çështje kryesore për Evropën, duke dalluar migrimin e menaxhuar nga ai masiv.
"Ata kanë vlera të ndryshme, jo të drejta ose të gabuara, por të ndryshme nga tonat", shtoi ambasadori. Ai shpjegoi se gjatë dekadës së fundit Evropa ka parë flukse njerëzish dhe reagimi nuk ka qënenë pozitiv. Kur u pyet për rënien e mbërritjeve të migrantëve në BE, Puzder argumentoi se Rubio fliste për ndikimin e migrimit masiv të së kaluarës dhe sfidën qytetëruese që paraqet.