Sekretari i Shtetit i SHBA-së, Marco Rubio, deklaroi se Amerika nuk kërkon që aleatët evropianë të jenë vasalë apo shërbëtorë, por partnerë më pak të varur nga Uashingtoni. Ai bëri këto komente të dielën në një konferencë të përbashkët për shtyp në Bratislavë, pas bisedimeve me kryeministrin sllovak Robert Fico.
Sllovakia përbën ndalesën e parë në turneun dy-shtetëror të Rubios në Evropën Qendrore, të nisur pas pjesëmarrjes në Konferencën e Sigurisë në Mynih. Pas Sllovakisë, ai udhëtoi për në Hungari, për një takim me kryeministrin Viktor Orbán, me qëllim diskutimin e marrëdhënieve dypalëshe dhe forcimin e lidhjeve me aleatët e administratës Trump në rajon.
Fico dhe Orbán janë aleatë kryesorë të administratës Trump në Evropë, të cilët mbështesin politikat anti-imigracion dhe vizionin për përfundimin e luftës në Ukrainë. Duke iu përgjigjur një pyetjeje gazetarije, Rubio minimizoi vendimin e SHBA-së për tërheqjen e një numri të kufizuar trupash amerikane nga Evropa.
"Ne nuk po largohemi nga NATO, mund të zhvendosim disa mijëra trupa nga një vend në tjetrin, por kjo ka qenë gjithmonë kështu", tha ai. "Ne nuk duam që Evropa të jetë e varur nga ne, nuk po i kërkojmë Evropës të jetë vasal i Shteteve të Bashkuara. Ne duam të jemi partneri juaj. Sa më të fortë të jeni ju, aq më e fortë është NATO".
Të shtunën në Mynih, Rubio theksoi se SHBA-të dhe Evropa ndajnë një fat të përbashkët. Ai paralajmëroi për rënie kulturore dhe ekonomike të Evropës, si dhe nevojën për të ndaluar migrimin masiv. Ai u bëri thirrje evropianëve të bashkohen me vizionin e presidentit Trump për mbrojtjen e qytetërimit perëndimor dhe forcimin e lidhjeve transatlantike.
Përditësime
Kaja Kallas, shefja e diplomacisë së BE-së, reagoi ndaj komenteve të senatorit amerikan Marco Rubio. Ajo deklaroi se Europa nuk është 'woke' apo dekadente dhe duhet të forcojë zërin e saj.
SHBA do t'i lëshojnë dy poste kryesore komanduese në NATO për përfaqësues evropianë:
- selia në Napoli, Itali;
- selia në Norfolk, Virxhinië, SHBA.
Marco Rubio theksoi se Evropa Qendrore do të jetë një rajon kyç për angazhimin e administratës në detyrë me Evropën. Ai shtoi: «Ne duam të punojmë me Evropën. Dhe poenta jonë është: sa më të fortë të jeni ju...»