Marco Rubio, sekretari amerikan i Shtetit, paralajmëroi se Shtetet e Bashkuara do të heqin vizat për çdo person që vepron kundër interesave kombëtare të tyre. Deklarata u bë më 16 shkurt 2026, gjatë një vizite zyrtare në Budapest, Hungari.
I pyetur për çështjen e pezullimit të vizave, Rubio u shpreh: “E kam thënë këtë vazhdimisht. Nuk e kuptoj pse për disa është kaq e vështirë ta kuptojnë. Nëse hyni në vendin tonë si vizitor dhe ndërmerrni veprime kundër interesave kombëtare të Shteteve të Bashkuara, ne do t’jua heqim vizën”.
Deklaratat u dhanë gjatë takimit me kryeministrin hungarez Viktor Orbán. Rubio theksoi se marrëdhëniet mes SHBA-së dhe Hungarisë ndodhen në një “fazë të artë”. Ai vlerësoi bashkëpunimin konkret mes dy vendeve, sidomos në fushat e ekonomisë dhe energjisë.
Sipas tij, Hungaria është shndërruar në një partner të rëndësishëm për SHBA-në, me investime amerikane në rritje në këtë vend. Rubio cilësoi klimën e biznesit në Hungari si të qëndrueshme dhe konkurruese.