Rubio në Konferencën e Mynihut: SHBA-ja dhe Evropa i përkasin njëra-tjetrës

Marco Rubio, sekretari i Shtetit amerikan, hapi fjalimin e tij në Konferencën e Sigurisë në Mynih të shtunën, duke vënë në dukje rëndësinë historike të aleancës midis SHBA-së dhe Evropës, e cila "e ka shpëtuar botën" nga kërcënimet e së kaluarës.

Rubio pohoi se SHBA-ja ndonjëherë mund të jetë "direkte", por administrata Trump është e përkushtuar ndaj aleancës. "Derisa jemi të përgatitur nëse është e nevojshme ta bëjmë këtë vetëm, por ne preferojmë dhe shpresojmë ta bëjmë me ju, miqtë tanë këtu në Evropë", tha ai.

Ai shtoi: "SHBA-ja dhe Evropa i përkasin njëra-tjetrës", duke theksuar partneritetin prej dekadash, i cili është vënë nën presion të madh gjatë mandatit të dytë të presidentit Donald Trump.

Rubio nënvizoi nevojën për ndryshim në bashkëpunim: "Ne duam aleatë që janë krenarë me kulturën dhe trashëgiminë e tyre… dhe bashkë me ne janë të gatshëm dhe të aftë t’i mbrojnë ato".

Sa i përket organizatave ndërkombëtare, ai deklaroi se ato nuk duhet të shpërbëhen, por të rindërtohen dhe reformohen për sfidat e reja. OKB-ja ka "potencial të jashtëzakonshëm", por ka dështuar të zgjidhë luftën në Gaza apo në Ukrainë, duke u treguar "e pafuqishme".

"Në një botë të përsosur, të gjitha këto probleme dhe shumë të tjera do të zgjidheshin nga diplomatët dhe rezolutat me formulime të forta. Por ne nuk jetojmë në një botë të përsosur dhe nuk mund të vazhdojmë të lejojmë që ata që haptazi dhe pa drojë kërcënojnë qytetarët tanë dhe rrezikojnë stabilitetin tonë global të fshihen pas abstraksioneve të së drejtës ndërkombëtare, të cilën vetë e shkelin rregullisht", përfundoi Rubio.