Ambasadorja e Izraelit në Kosovë, Tamar Ziv, në një intervistë për emisionin "Click" në RTV21, deklaroi se Izraeli është i kënaqur me përfshirjen e Kosovës në Bordin e Paqes dhe në misionin paqeruajtës në Gaza.
Ajo tha se Presidenti Trump e ka përfshirë Kosovën në këtë forcë, çka tregon besim në aftësitë e saj për të kontribuar në ndërtimin e paqes në Lindjen e Mesme. "Fillimisht, ne jemi shumë të lumtur që Presidenti Trump e ka përfshirë Kosovën në Bordin e Paqes, në forcën paqeruajtëse. Mendoj se kjo është shumë e rëndësishme dhe tregon një besim në aftësitë e Kosovës për të qenë partner në këtë proces", u shpreh ajo.
Ziv theksoi se Kosova është në mesin e pesë vendeve që do të dërgojnë trupa në Rripin e Gazës dhe se duhet pritur për të parë mandatin e secilit. Ajo mirëpriti vendimin e Qeverisë së Kosovës për këtë mision, me shpresën për një Lindje të Mesme më të mirë. Megjithatë, sipas saj, gjithçka varet nga reagimi i Hamasi ndaj forcave të këtyre vendeve. "Sërish, shumëçka varet nga Hamasi dhe si do të reagojë Hamasi ndaj vendeve të ndryshme që do të dërgojnë forcat në Rripin e Gazës. Është shumë herët të thuhet se si do të zhvillohet situata", deklaroi ambasadorja.
Sa i përket aftësive të FSK-së në këtë mision, Ziv përsëriti se zhvillimi do të varet nga reagimi i Hamasi.
Ajo foli edhe për marrëdhëniet mes Kosovës dhe Izraelit gjashtë vite pas njohjes në 2021. Që nga atëherë, janë arritur marrëveshje të rëndësishme, si ajo për lëvizjen pa viza, e cila ka ndihmuar tregtinë, marrëdhëniet kulturore, akademike dhe turizmin. "Ne natyrisht ishim shumë të lumtur që të vendosim marrëdhënie me Kosovën. Që nga vendosja e marrëdhënieve në vitin 2021, ne krijuam hapësira për këtë marrëdhënie dhe investuam në marrëveshje të ndryshme", tha ajo, duke shtuar se do të punojnë për thellimin e tyre pas luftës.