Ambasadorja e Zvicrës në Shqipëri, Ruth Huber, gjatë një vizite në Korçë ku u takua me kryetarin e bashkisë, Sotiraq Filo, u pyet nga mediat lidhur me protestat e vazhdueshme në vend, përfshirë ato kundër projektit turistik në Zvërnec.
Duke iu përgjigjur pyetjes për qëndrimin e saj ndaj protestave dhe mesazhit për qeverinë shqiptare, Huber u shpreh se kjo është një çështje politike dhe është e vështirë për t’u komentuar si përfaqësuese e një ambasade të huaj. Megjithatë, ajo theksoi se pjesëmarrja e qytetarëve në protesta mbetet një element i rëndësishëm i çdo sistemi demokratik, duke e krahasuar atë me përvojën në Zvicër.
“Ne, përmes programit tonë të zhvillimit, forcojmë demokracinë me mbështetjen tonë ndaj parlamentit kombëtar dhe atyre lokale. Kemi një mbështetje afatgjatë për shoqërinë civile, kështu që instrumentet demokratike dhe pjesëmarrja e njerëzve në protesta janë elemente të rëndësishme të çdo sistemi”, deklaroi ambasadorja Huber.