Amir Shaipi, portieri i Kosovës te Lugano, ka pritur penalltinë e gjuajtur nga Xherdan Shaqiri në minutën e 62-të të ndeshjes ndaj Baselit, në xhiron e 25-të të Superligës zvicerane të zhvilluar më 15 shkurt 2026.
Benie Traore e kaloi Baselin në epërsi në minutën e 30-të nga penalltia. Në minutën e 62-të u akordua penallti për Baselin. Shaqiri e gjuajti fillimisht, por Shaipi e priti. Penalltia u përsërit për shkak të hyrjes së hershme në zonë nga një lojtar i Baselit, dhe në ekzekutimin e dytë topi përfundoi mbi portë. Lugano barazoi shifrat në 1:1 në minutën e 64-të me golin e Georgios Koutsias.
Ndeshja u mbyll me barazim 1:1.
Kjo nuk është hera e parë që Shaipi e ndalon Shaqirin nga pika e bardhë. Më 9 nëntor 2025, në ndeshjen e mëparshme mes të dyja skuadrave, Shaipi e priti penalltinë e tij në minutën e 27-të, duke kontribuar në fitoren 1:0 të Luganos.
Pas kësaj xhiroje, Lugano renditet në vendin e tretë me 43 pikë, ndërsa Baseli është i katërti me 40 pikë. Shaqiri, kapiten i Baselit, luajti tërë ndeshjen, si dhe Albian Ajeti deri në minutën e 66-të, me Dion Kacuri në stol. Te Lugano, përveç Shaipit, tërë takimin e luajtën edhe Uran Bislimi.
Sipas mediave zvicerane, Shaqiri ka humbur 5 nga 9 penalltitë këtë sezon.