Në një intervistë për SportWeek, trajneri italian Carlo Ancelotti foli për përshtatjen e tij në krye të kombëtares së Brazilit dhe ambiciet e mëdha të këtij ekipi. Ai e krahasoi situatën aktuale me vitin 2013, kur u bashkua me Real Madridin, duke theksuar se dëshira e tifozëve brazilianë për të fituar titullin botëror pas 24 vitesh mungesë i kujton obsesionin që klubi spanjoll kishte për “La Decima”.
Ancelotti pranoi se është befasuar nga dashuria dhe mbështetja e tifozëve, duke u ndier shumë i vlerësuar në rolin e tij të ri. Tekniku italian theksoi se është përshtatur më shpejt se sa kishte menduar me detyrën e përzgjedhësit të kombëtares, duke vlerësuar pasionin unik dhe të sinqertë që karakterizon futbollin në Brazil, ndryshe nga vendet e tjera ku ka punuar më parë.
Objektivi kryesor i Ancelottit mbetet rikthimi i Brazilit në majën e futbollit botëror. Me këtë angazhim, ai synon t'i japë fund pritjes së gjatë të tifozëve dhe të sigurojë trofeun e gjashtë për “Seleçaon”.