Në ditën e 44-t të protestës që po zhvillohet në bulevardin "Dëshmorët e Kombit", aktivisti Andi Tepelena u është drejtuar qytetarëve para godinës së Kryeministrisë. Në fjalën e tij, ai theksoi se gjatë kësaj periudhe qëndrese ka lindur një shpresë e madhe për të përmbyllur procesin e nisur në vitin 1991.
Sipas Tepelenës, rinia brenda vendit dhe ajo në diasporë kanë një rol vendimtar në ndryshimin e situatës. Ai u shpreh se Shqipëria është e pasur me talente, të cilat kanë potencialin për të marrë në dorë fatet e qeverisjes së vendit.
"Janë këta të rinj që jetojnë këtu dhe në diasporë, që mezi presin të çlirohen nga ky sistem korruptiv, të rrëzohet kjo kastë korruptive që po mban peng zhvillimin e vendit", deklaroi Tepelena.
Ai gjithashtu u ndal te mbështetja ndërkombëtare, duke veçuar qëndrimin e Gjermanisë. Tepelena nënvizoi se ambasadori gjerman në Shqipëri ka rikonfirmuar për herë të dytë rëndësinë e protestës si një e drejtë demokratike e qytetarëve.