Ish-mesfushori i FC Barcelonës dhe i kombëtares së Spanjës, Andres Iniesta, ka ndërmarrë hapin e parë në karrierën e tij si trajner. Ai është emëruar në krye të Gulf United FC, skuadër që militon në divizionin e dytë të futbollit në Emiratet e Bashkuara Arabe.
Iniesta, i cili e mbylli karrierën si lojtar në këtë rajon pas aventurës tek Emirates Club, e vlerëson këtë angazhim si mundësinë ideale për të fituar përvojë të drejtpërdrejtë në pankinë. "Gulf United duket vendi i përkryer për të nisur këtë kapitull të ri. Futbolli më ka dhënë gjithçka dhe tani dua të kontribuoj përmes trajnimit dhe punës me lojtarët e rinj", deklaroi spanjolli.
Klubi Gulf United, i themeluar në vitin 2019, njihet për akademinë e tij që numëron mbi 600 futbollistë nga më shumë se 80 vende të botës. Për ish-kapitenin e Barcelonës, ky vendim përfaqëson fillimin e një rrugëtimi të ri profesional. Iniesta mbetet një nga futbollistët më të dekoruar në histori, fitues i Kupës së Botës 2010 dhe dy herë kampion i UEFA Euro (2008 dhe 2012).