Ish-anësori i kombëtares argjentinase, Angel Di Maria, ka shprehur besimin e tij se Lionel Messi ka ende mundësi për të kontribuar në nivelin më të lartë të futbollit. Kjo deklaratë vjen pas përfundimit të Kupës së Botës 2026, ku Argjentina u rendit në vendin e dytë pas humbjes në finale përballë Spanjës në New Jersey.
Gjatë këtij turneu, Messi arriti shifra historike, duke u bërë futbollisti i dytë pas brazilianit Cafu që merr pjesë në tri finale të Kupës së Botës për meshkuj. Gjithashtu, ai u shpall finalisti i dytë më i vjetër në historinë e këtij kompeticioni, duke u renditur pas italianit Dino Zoff.
E ardhmja e tetë herë fituesit të Topit të Artë mbetet temë diskutimi në opinionin sportiv. Përderisa bashkëlojtari i tij, Leandro Paredes, pati deklaruar së fundmi se Messi kishte vendosur të tërhiqej pas finales, mungesa e një konfirmimi zyrtar nga vetë kapiteni ka lënë vend për spekulime. Angel Di Maria, i cili aktualisht aktivizohet me Rosario Central, theksoi se vendimi për të vazhduar duhet t'i përkasë ekskluzivisht dëshirës së futbollistit.
"Leo duhet të vazhdojë për aq kohë sa ai dëshiron. Mendoj se ai mund të vazhdojë edhe për shumë vite të tjera. Në moshën 39-vjeçare ka treguar se është ende një nga më të mirët dhe se mund të vazhdojë të jetë një nga futbollistët më të mëdhenj në histori", u shpreh Di Maria, duke shtuar se për lojtarin nuk ka më asgjë për të provuar në karrierën e tij.