Përfaqësuesja e Anglisë është në bisedime për të organizuar një ndeshje miqësore private gjatë zhvillimit të Kupës së Botës 2026. Kundërshtari i propozuar për këtë takim është skuadra e MLS, Sporting Kansas City.
Sipas planit të stafit teknik të drejtuar nga Thomas Tuchel, ndeshja do të zhvillohej pas takimit hapës të Grupit L kundër Kroacisë në Dallas dhe përpara sfidës së dytë ndaj Ganës, e cila është planifikuar për të martën e ardhshme. Burime pranë Federatës Angleze të Futbollit konfirmojnë se diskutimet janë në proces, megjithëse ende nuk është marrë një vendim përfundimtar mbi detajet logjistike dhe konfirmimin e kundërshtarit.
Qëllimi kryesor i kësaj iniciative është ruajtja e ritmit konkurrues dhe nivelit fizik të futbollistëve që nuk pritet të kenë minutazh të plotë në ndeshjet zyrtare. Ky model pune është aplikuar nga përfaqësuesja edhe më herët, gjatë periudhës së përgatitjeve në Florida, kur u zhvillua një ndeshje stërvitore private kundër Miamit.
Pas ndeshjeve me Kroacinë dhe Ganën, Anglia do të përmbyllë fazën e grupeve të turneut me përballjen kundër Xhamajkës.