Anija tregtare shqiptare Rafaelo, gjatë kthimit nga Aleksandria e Egjiptit, ka shpëtuar 38 emigrantë sudanezë në ujërat ndërkombëtare. Ngjarja ka ndodhur pak ditë më parë në det të hapur, në zonën ndërmjet Libisë dhe ishullit të Kretës.
Fillimisht, në drejtim të anijes ka ardhur një sinjal nga kapiteneria greke për një objekt në rrezik, rreth 100-150 kilometra larg. Anija ka ndryshuar kurs dhe ka nisur operacionin e kërkimit.
Marinari shqiptar nga Elbasani, Dhimitër Lala, ka bërë të ditur se pas 4-5 orësh kërkimesh, Rafaelo ka pikasur një gomone në gjendje të rënduar, me rrezik të lartë për t’u përmbysur për shkak të mbingarkesës dhe kushteve të vështira të detit.
Ndërsa ekuipazhi shqiptar ka nisur shpëtimin, në ndihmë është bashkuar anija e madhe transoqeanike italiane Olbia. Brenda një kohe të shkurtër, të gjithë personat në rrezik janë evakuuar në bordin e anijes shqiptare dhe më pas u janë dorëzuar autoriteteve greke.
Të shpëtuarit janë 38 emigrantë, të gjithë të moshës 18-30 vjeç.