Antonio Conte, trajneri i Napolit, ka mohuar kategorikisht zërat që e lidhin me marrjen e drejtimit të kombëtares italiane, pas dorëheqjes së Gennaro Gattuso-s nga posti i selektorit.
Kombëtarja italiane po kërkon një trajner të ri, pasi dështoi të kualifikohet në Kupën e Botës, çka çoi në largimin e Gattuso-s. Emri i Conte-s është përmendur si një nga kandidatët kryesorë nga mediat italiane.
Conte ka reaguar duke thënë se nuk ka deklaruar kurrë gatishmërinë për të marrë drejtimin e Azzurrëve. "Nuk kam thënë kurrë që jam i gatshëm. Kam ende një vit kontratë me Napolin dhe në fund të sezonit do të flas me presidentin", u shpreh ai.
Ai ka kërkuar gjithashtu nga mediat të interpretojnë saktë deklaratat e tij. "Ju bëj thirrje të fortë që t’i interpretoni fjalët e mia saktë. Përndryshe, nëse vazhdojnë të shtrembërohen, nuk do të flas më fare", deklaroi Conte.
Ndërkohë, Napoli ka barazuar ndaj Parmas në fundjavë dhe duket se është pajtuar me pozitën e nënkampionit në Serie A.