Trajneri Antonio Conte do të largohet nga Napoli në fund të sezonit aktual. Njoftimi zyrtar pritet të bëhet pas ndeshjes kundër Udineses, me shumë gjasa nga presidenti Aurelio De Laurentiis.
Largimi do të bëhet me marrëveshje të dyanshme. Conte ka kontratë deri në verën e vitit 2027, por ai ka vendosur të heqë dorë nga paga prej rreth 8 milionë euro që do të merrte nëse qëndronte deri atëherë.
Gjatë periudhës së tij te Napoli, trajneri ka regjistruar 53 fitore, 19 barazime dhe 18 humbje në 90 ndeshje. Ai udhëhoqi skuadrën drejt fitimit të titullit të Serie A në sezonin e parë dhe të Superkupës së Italisë këtë vit.
Burimet italiane shkruajnë se Conte e konsideron të mbyllur ciklin e tij te klubi dhe se synon të marrë drejtimin e kombëtares italiane. Presidenti De Laurentiis nuk ka kundërshtuar vendimin dhe tashmë ka filluar kërkimet për pasues. Në listë përmenden emrat e Maurizio Sarrit, Massimiliano Allegrit dhe disa trajnerëve të tjerë.
Napoli planifikon të reduktojë fondin e pagave, i cili aktualisht është 110 milionë euro, dhe të rinovojë skuadrën me mesatare moshe 28 vjeç.