Trajneri i Napolit, Antonio Conte, është pezulluar me dy ndeshje në Serie A dhe një gjobë prej 15 mijë eurosh nga Gjykatësi sportiv i kampionatit italian. Vendimi u mor pas kartonit të kuq të marrë në ndeshjen e zhvilluar të dielën kundër Interit, ku Napoli luajti në transfertë.
Në pjesën e dytë të takimit, arbitri Daniele Doveri akordoi një penallti në favor të Interit pas rishikimit me VAR për një faull të lojtarit të Napolit, Amir Rrahmani, ndaj Henrikh Mkhitaryan. Kjo e bezdi Conte-n, i cili humbi durimin dhe iu drejtua zyrtarëve të ndeshjes me fraza të padenja. Ai goditi fort një top nga vija anësore, u afrua në mënyrë intimiduese ndaj gjyqtarit të katërt, Colombo, duke protestuar ashpër dhe duke e quajtur vendimin "turp". Para se të largohej nga fusha, Conte hodhi një shishe uji në tokë dhe vazhdoi të sulmonte zyrtarët verbalisht, duke përsëritur sjelljen e tij edhe në tunelin drejt dhomave të zhveshjes.
Si pasojë e këtij incidenti, Conte nuk do të jetë në stol për dy ndeshjet e ardhshme të Napolit: kundër Parmas dhe Sassuolos, të dyja në "Stadio Maradona". Motivacioni zyrtar i dënimit thekson se sjellja e trajnerit italian ishte e papërshtatshme dhe shkelte rregullat e disiplinës sportive.
Në të njëjtin vendim të Komisionit Disiplinor, trajnerë të tjerë si Paolo Vanoli dhe Davide Nicola u pezulluan me nga një ndeshje pas kartonave të kuq në raundin e fundit të Serie A. Gjithashtu, disa futbollistë morën pezullime që varionin nga një deri në tre ndeshje, por detajet specifike për ta nuk u bënë publike në vendimin kryesor.