Presidenti i Këshillit Evropian, Antonio Costa, gjatë fjalës së tij në Forumin TEHA në Cernobbio të Italisë, vlerësoi procesin e zgjerimit të Bashkimit Evropian si një histori suksesi. Sipas Costa-s, zgjerimi i ardhshëm drejt Shqipërisë, vendeve të Ballkanit Perëndimor, Ukrainës dhe Moldavisë do ta fuqizojë Unionin si një aktor gjeopolitik për paqen, sigurinë dhe sundimin e ligjit.
Duke iu referuar përvojës së mëparshme, Costa e cilësoi zgjerimin si investimin më të madh gjeopolitik që Evropa ka ndërmarrë ndonjëherë. Në përgjigje të zërave kritikë, ai hodhi poshtë pretendimet se Evropa është në rënie, duke theksuar se unioni duhet të përqendrohet në rritjen e konkurrueshmërisë dhe në shpejtësinë e vendimmarrjes së bashkuar.
Antonio Costa njihet si një nga mbështetësit kryesorë të anëtarësimit të Shqipërisë brenda vitit 2030. Ai e vlerësoi Shqipërinë si një vend pretendent që ndodhet në rrugën e duhur drejt anëtarësimit, duke nënvizuar se procesi i zgjerimit është një domosdoshmëri strategjike për të gjithë Bashkimin Evropian.