Në Gjykatën Themelore në Prishtinë u anulua seanca e paraparë për të hënën në rigjykimin ndaj Muhamet Alidemaj, i akuzuar për krime lufte në Izbicë gjatë marsit 1999. Anulimin e konfirmoi kryetari i trupit gjykues, Vesel Ismaili, për arsye se Prokuroria Speciale propozoi dëgjimin e dëshmitarëve të rinj.
Sipas aktakuzës së ngritur më 29 mars 2022, Alidemaj, si pjesëtar i forcave policore dhe ushtarake serbe gjatë periudhës 24 mars – 11 qershor 1999, mori pjesë në ndarjen e grave dhe fëmijëve, të cilët u detyruan të shkonin drejt Shqipërisë. Burrat e mbetur u ekzekutuan me armë automatike, duke vrarë 130 persona, prej të cilëve 114 u identifikuan, ndërsa 12 civilë mbijetuan. Pas dy muajsh, trupat u zhvarrosën me ekskavator dhe u transportuan.
Historia e procesit gjyqësor
Në seancën fillestare të gjykimit të parë, më 29 prill 2022, Alidemaj u deklarua i pafajshëm. E njëjta deklaratë u bë në seancën fillestare të rigjykimit më 23 tetor 2025.
Më 12 korrik 2024, Gjykata Themelore në Prishtinë e shpalli fajtor Alidemaj dhe e dënoi me 15 vjet burg për krime lufte. Për dispozitivin e dytë, lidhur me zhvarrosjen e trupave, u shqiptua aktgjykim refuzues, pasi prokurori Ilir Morina u tërhoq nga kjo pikë në seancën e 9 korrikut 2024, për mungesë provash mbi pjesëmarrjen e të akuzuarit.
Gjykata e Apelit e ktheu rastin në rigjykim.
Përditësime
Xhevrie Thaçi dëshmoi në rigjykimin ndaj Muhamet Alidemaj për krime lufte, ku përshkroi ngjarjet e 28 marsit 1999 në Izbicë. Forcat serbe i nxorën nga shtëpitë rreth orës 07:00 dhe i vendosën në arë. Pas maltretimit me shqelma, forcat që flisnin shqip e pyetën për burrin e saj dhe e akuzuan se ai ishte në UÇK.