Gjykata e Posaçme e Apelit për Korrupsionin dhe Krimin e Organizuar (GJKKO) ka rrëzuar kërkesën e Argita dhe Jamarbër Malltezit për heqjen e sekuestros preventive të pasurive të tyre. Vendimi u shpall më 16 janar 2026, duke lënë në fuqi aktin nr. 662, datë 27 tetor 2025, të Gjykatës së Posaçme të Shkallës së Parë për Korrupsionin dhe Krimin e Organizuar.
Trupi gjykues monokratik, i kryesuar nga gjyqtari Engert Pëllumbi, shqyrtoi çështjen penale nr. 13, e regjistruar më 7 janar 2026. Sipas njoftimit zyrtar, vendosi miratimin e aktgjykimit të shkallës së parë, duke mbajtur në fuqi sekuestrën e kërkuar nga organet e hetimit.
Sekuestrohen 25 pasuri, duke përfshirë pasuri të paluajtshme, llogari bankare, apartamente, një vilë në Gjirin e Lalëzit, si dhe pjesëmarrje në kapitalin e disa kompanive. Këto masa u morën në kuadër të hetimeve për aferën “Partizani”.
Çifti Malltezi kishte ankimuar vendimin e gjykatës së parë, por Apeli e refuzoi kërkesën, duke ruajtur masat e sigurimit.