Gjykata e Posaçme e Apelit për Korrupsionin dhe Krimin e Organizuar ndryshoi këtë të martë, më 30 qershor 2026, vendimin e shkallës së parë për çështjen penale që përfshin ish-drejtorin e Inspektoriatit të Mbrojtjes së Territorit (IMT) në Bashkinë e Tiranës, Mariglen Qato. Trupi gjykues monokratik, i kryesuar nga gjyqtarja Iliriana Olldashi, pranoi kërkesën e të pandehurit për ndryshimin e masës së sigurimit.
Vendimi urdhëron zëvendësimin e masës "arrest në burg", të caktuar më 28 mars 2024, me masën "arrest në shtëpi". Qato është urdhëruar të mos largohet nga banesa e tij. Gjykata ka urdhëruar lirimin e menjëhershëm të tij nga ambientet e paraburgimit, nëse nuk mbahet për arsye të tjera ligjore, ndërsa Prokuroria e Posaçme (SPAK) ngarkohet me ekzekutimin e vendimit.
Mariglen Qato është i përfshirë në hetime lidhur me dosjen e njohur si "5D", ku përballet me akuzat për:
• Korrupsion pasiv në katër raste;
• Pastrim të produkteve të veprës penale;
• Fshehje të pasurisë.
Prokuroria e Posaçme ka kërkuar dënimin me 9 vite burg për ish-zyrtarin. Aktualisht, procesi gjyqësor për dosjen në fjalë ndodhet në fazën e paraqitjes së mbrojtjes nga të pandehurit.